|
|
Articles: Poetry | నో చాన్స్! - Mr. Devender Chintala Devender
| |
రవి రోజూ ఉదయిస్తున్నా
రోజురోజుకీ నాలోని కవి
కనుమరుగవుతున్న వైనం
నా అంతరంగాన ప్రస్ఫుటమవుతున్న
బాధ అంతా యింతా కాదు.
ప్రేయసి తన ప్రేమని పంచనంతవరకూ
దైవం తన కరుణని ప్రసాదించనంతవరకూ
మిత్రుడు తన మైత్రిని బహిర్గతపరచనంతవరకూ
శత్రువు సైతం తన ఉనికిని తెలపనంతవరకూ
సంధ్యాసంధ్యల్లో సాగర కెరటాలు
తన సోయగాలని ఆవిష్కరించనంతవరకూ
నాలో నేను రసస్పందన పొందనంతవరకూ
ప్రకృతి తనదైన ఆకృతితో
నా హృదిని చైతన్యపరచేంత వరకూ
నాలోని కవితాత్మ
అంకురించను
అక్షరించను
అని మొండికేసింది
అక్షరం సైతం సూక్ష్మంగా
నాలో నిక్షిప్తమై
లిప్తంగా ఉంటానంటుంది
కలకాలం అండగా నిలవాల్సిన అక్షరం
నాందీ ప్రస్తావనకి కూడా హుళక్కి చెప్తూ
కలకలం రేపుతున్న
కలం మాత్రం మౌనసాక్షిగా నిలచింది.
మనసెందుకో చాంచల్యమౌతుంది
ఏ భావనలూ,
ప్రకంపనలూ, ఘటనలూ
సంఘటనలూ లేవే
ఏవిటీ విచిత్రం?
మనసు చెదిరితే
ఓ కవితకి అంకురార్పణ
అదే మనసు ఆహ్లాదపడితే
ఓ కథకి ప్రేరణ
మనసు ఖాళీ అయితే మట్టుకు
కథకీ,
కవితకీ
నో చాన్స్!
| Read 1 Comment(s) posted so far on this Article!
| |
|
|
|
|
Advertisements |
|
|
|
Advertisements |
|